இது நியாயமே கிடையாது நீதிபதி அவர்களே,

வாய் பேச முடியாத ஒரு சிறுமியை பாலியல் கூட்டு வன்புணர்வு செய்த ஒரு கொடுமையான பிரச்சினையில் நீதி கிடைக்க சி.பி.ஐ விசாரணை வேண்டும் என்று ஒரு வழக்கு சென்னை உயர் நீதி மன்றத்திற்கு வருகிறது. சி.பி.ஐ விசாரணைக்குப் பதிலாக சிபி.சி.ஐ.டி விசாரணைக்கு நீதிபதி உத்தரவிடுகிறார். ஆனால் விசாரணைக்கு முன்பாகவே அவரே வழக்கு பற்றி ஏராளமான முடிவுகளை அள்ளி விடுகிறார். இது விசாரணையை எந்த அளவு பாதிக்கும் என்பது பற்றிக் கூட அவர் கவலைப்படவில்லை.

அதனால்தான் அவர் தெரிவித்துள்ள கருத்துக்களை திரும்பப் பெற வேண்டும் என்று அனைத்து வகை மாற்றுத் திறனாளிகள் மற்றும் பாதுகாப்போர் உரிமைகளுக்கான சங்கமும் அனைத்திந்திய ஜனநாயக மாதர் சங்கமும் உயர் நீதி மன்ற தலைமை நீதிபதிக்கு கடிதம் எழுதியுள்ளார்கள்.

தமிழக நீதித்துறை எங்கே சென்று கொண்டிருக்கிறது என்ற கேள்வியை இக்கடிதம் அழுத்தமாக எழுப்புகிறது.

சாமானிய மக்களுக்கு நீதி எட்டாக்கனிதானா? அறிக்கையை படியுங்கள். உங்களுக்கும் இக்கேள்வி கண்டிப்பாக எழும்.