ஆணவக் கொலைகளுக்கெதிராய் நல்ல துவக்கம்

உடுமலைப்பேட்டை சங்கர் கொலை வழக்கில் கௌசல்யாவின் தந்தை உள்ளிட்டோருக்கு மரண தண்டனை அளிக்கப்பட்டுள்ளது ஜாதிய ஆணவக் கொலைகள் நிகழ்த்தும் அராஜகவாதிகளுக்கு எதிரான நல்ல துவக்கம்.

சங்கரின் கொலைக்கு காரணமான கௌசல்யாவின் தாய் குற்றவாளி என்றாலும் விடுவிக்கப்பட்டது சரியில்லை. அதற்கு எதிராக தான் மேல்முறையீடு செய்யப்போவதாக தோழர் கௌசல்யா கூறியுள்ளது பாராட்டத்தக்கது.

தோழர் கௌசல்யாவின் எதிர்கால கல்விச்செலவை நாங்கள் பொறுப்பேற்கிறோம் என்று அறிவித்து அதற்கான நிதியையும் அதன் மூலம் அவருக்கு நம்பிக்கையையும் அளித்த கோவைக் கோட்ட காப்பீட்டுக் கழக ஊழியர் சங்கத்திற்கும் பாராட்டுக்களை தெரிவிக்கும் நேரம் இது. 

அரசியலில் முகவரியை இழக்கும் நேரத்தில் அதனை தக்கவைக்க தர்மபுரியில் வெறியாட்டம் நடத்திய பாமக தமிழகத்தில் ஆணவக் கொலைகள் மீண்டும் அதிகரிக்க ஒரு முக்கியக் காரணம் என்பதை நாம் மறந்திடக் கூடாது. 

கௌசல்யாவிற்கு இருந்த துணிவு திவ்யாவிற்கு இருந்திருந்தால் ஒருவேளை இளவரசனின் மரணம் கூட நிகழ்ந்திருக்காதோ என்ற சிந்தனை வருவதை தவிர்க்க இயலவில்லை.

ஜாதிய ஆணவக் கொலைகளுக்கு எதிராக உறுதியோடு போராடி வரும் தமிழ்நாடு தீண்டாமை ஒழிப்பு முன்னணியின் முயற்சிகளை, அதற்காக ஒரு தனிச்சட்டம் வேண்டுமென்ற நடைப்பயணத்தை எல்லாம் இத்தருணத்தில் நினைவில் கொள்ள வேண்டும்.

மரண தண்டனை அவசியமா என்ற விவாதம் ஒரு புறம் இருந்தாலும் ஜாதிவெறியில் மூழ்கிப்போனவர்களின் அராஜகச் செயலுக்கு சவுக்கடி என்ற விதத்தில் இத்தீர்ப்பு முக்கியமானது. வரவேற்கத்தக்கது. 

கொலையாளிகள் தன் பெற்றோர் என்ற போதிலும் அவர்களுக்கு எதிராக உறுதியோடு போராடிய தோழர் கௌசல்யாவின் உறுதி பாராட்டத்தக்கது.

பி.கு : படம் தோழர் வெண்புறா சரவணன். நன்றி தோழரே